LETTRE DE DEMISSION DU CNDD DE JEAN MARIE NGENDAHAYO

Note de la rédaction : Nous publions une lettre en kirundi de Jean Marie Ngendahayo, député burundais, vivant actuellement aux Etats Unis. Nous nous excusons pour nos amis francophones.

Burundi news, le 01/02/2009

                                                                                  Itariki 27 Nzero umwaka 2009

Kuri Nyakubahwa

Leonardo Nyangoma

Kizigenza c-umugambwe

CNDD

I BURUNDI.

                                                                  Umushingamateka

                                                                  Yohani-Maria Ngendahayo

                                                                  Texas

                                                                  Ibihugu Vyunze Ubumwe Vyo Muri

                                                                  AMERIKA.

Ibirimwo : Ukubikebanura ari na ko

                  Gutanga imihoho mu mugambwe

                 CNDD.

Nyakubahwa,

Nkuko umaze igihe ubizi maze amezi indwi naravuye mu gihugu ntacanse. Ibituma ndahava nka narondera ibindi vyo ntungira mu mahanga urabizi ni ya ntwaro yagakazo idasonera ijambo n-amategeko yeze kino gihe mu butegetsi bwa CNDD-FDD.

Hari haciye igihe narasezeye umugambwe CNDD-FDD kuko abatware bawo bananiranye guhanurwa. Igihugu gitera kija mu kaga, abanyagihugu bakicwa n-inzara ariko abadutwara bakarazwa ishinge no kwuzuza inda zabo bahonyanga amategeko, basahura ivya leta ni vyo bene igihugu bakunukiye.

Nkuko ubizi, twarahanuye turaruha. Hakudutega amatwi batwita abarozi. Kuko iyo uneguye umuhanuzi wawe ni uko aba akora nk-umurozi. Narababuriye dababwira icese mu nzege nkuru zu mugambwe, nu nama nshingamateka biciye mu vyandiko twandikiye umukuru w-igihugu, eka no mu binyamakuru vyinshi. Twarababwira ko aho biteye bashobora gufata ingendo ya Nyakubahwa Nelson Mandela we yiyemeje kunywanisha abanyagihugu bo muri Afirika yo Mu Bumanuko bari buzuye mwo inzanko n-intuntu ariko abashira ku nzira y-amategeko, y-ukuri n-iterambere ata wanrya wangura. Ndababwira nti vyanse naho bazoba bafashe inzira izimiza nkiyi ya Roberto Mugabe muri Zimbabwe aho wewe nakarwi ka batonyi batikije itunga ry-igihugu cahora ari rurangiranwa kw-isi yose none gusigaye kire aho umwansi ashaka. Narahanuye, hamwe n-abandi, ndaruha. Niho lero natanga imihoho muri CNDD-FDD.

Kugira ngo nsimbe inyakamwe mu nama nshigamateka no muri politike niho lero nabasaba kubandaniriza urugamba rwa demokarasi mu mugambwe wanyu. Kanatsinda, ntacari gitangaje twarwaniye demokarasi hamwe kuva kera na rindi naho rimwe na rimwe twagiye turatandukana kuvyiyumviro bimwe bimwe. Ni bisanzwe, uri umugabo nka ba uwundi kandi muri politike igikuru si ukwiyumvira kimwe kuri vyose ; igikuru ni ukwifuriza amahoro bose no kurwanira demokarasi ushira imbere inyungu y-abanyagihugu imbere y-iyawe. Nashaka lero kubakengurukira nivuye inyuma kubona mwaranyakiriye mu misi yamagume mu kanshira mu banyu. Mboneyeho no gushimira abategetsi bandi bose ba CNDD babibafashije mwo. Na kare umugabo agirwa n-abandi.

Nje lero gutanga icese imihoho no muri CNDD nongera ndabikebanura kuko nshimye guhagarika politike muri iyi misi ngo nitwararike ivyo ndimwo mu mahanga. Barayamaze bati : »Amabanga abiri ntabangikana ».

Mpejeje ndabifuriza mwebwe nabawe mu mugambwe no mu muryango imigisha y-Imana. Mwame murwanira amahoro, iterambera na demokarasi. Murwanye imisi yose ba nsumirinda kuko nibo bishe igihugu iyi myaka yose baba Abatutsi canke Abahutu. Ejo, si kera, abategetsi beza bazotwara igihugu Uburundi busibira busamirane mu makungu. Ni ukuvyizera n-ukubikorera.

Tugire Imana n-Uburundi yabuduhaye !

Umushingamateka

Yohani-Mariya Ngendahayo